സ്വപ്നം

വാപ്പാ എന്താ ഈ സ്വപ്നം?

സ്വപ്നം ന്നു വെച്ചാ  ഉറക്കത്തീ കാണണ കിനാവാണ് .

ന്നാ എന്താ ഈ കിനാവ് ?

അതൊരു സംഭവോണ്  കോയാ,  നമ്മളറിയാത്ത ലോകത്തിലേക്ക്  നമ്മളെ കൂട്ടി കൊണ്ട് പോവണ ഒരസ്സൽ സംഭവം.

ഈ സ്വപ്നം, കിനാവ് എന്നോക്ക പറയണ സംഭവം എന്തുട്ടന്നാ ചോദ്യം,

ഇതൊരു ബാല്യക്കാട്ട ദുനിയാവാണ് , ഈ ദുനിയാവില്  കോടിക്കണക്കിനു ആളുകള് ണ്ട്.  ആ ആളുകളൊക്കെ പലോടത്തും എത്താൻ ശ്രെമിച്  വേറെ എവ്ടെയോ ഒക്കെ എത്തി ചേർന്ന ആളുകള് ആണ്.  ഇഷ്ടമുള്ളടത്തെക്ക്  നമ്മളറിയാതെ കൊണ്ട് പോയി,നിന്നോടത്ത് തന്നെ തിരിച്ചു എത്തിക്കണ സാധനോണ് ഈ പറയണ  കിനാവ്.  ഒരു തരത്തിൽ പറഞ്ഞാ, അത് പടച്ചോന്റെ  ഒരു അനുഗ്രഹോണ് .

അപ്പ മ്മ്ട നബീസുനു പേടി ഉള്ളിടത്തെക്ക്  പോവാൻ ഇത്ര ഇഷ്ടോണ?

അതെന്താ?

അല്ല ഓള്  സ്വപ്നം കണ്ടു  പേടിച്ചു എണീറ്റ് ഒച്ച ഇടുക്കണ കേക്കാറില്ലേ. 

അതതല്ല, ഓൾടെ കുഞ്ഞി മനസ്സ്സല്ലേ, പേടിച് കെടന്നോണ്ട്  ഉറങ്ങിയാ ഇങ്ങനത്ത വേണ്ടാ കിനാവും കാണും.

അപ്പ ഈ സ്വപ്നം പടച്ചവന്റെ അനുഗ്രഹോണ്  ലെ?

ഇഷ്ടമുള്ളിടതെക്ക്  നമ്മളെ കൊണ്ട് പോവും ലെ?

അതെ.

ഞാൻ ഒന്ന് പോയി കിടന്നോറങ്ങാൻ പോണേണ് വാപ്പാ, നബീസുന്റടുത്ത്  എന്നെ വന്നു എണീപ്പിക്കരുത് നു പറയണം ട്ടാ വാപ്പാ. ഓളുറങ്ങുമ്പ  ഞാൻ ശല്യപെടുത്താറില്ല്ലല്ല.

നിനക്കെന്താ ഇപ്പ ഒരു ഉറക്കം?

ഉറക്കത്തിൽ ,ഇന്നെനിക്കെന്റെ ഉമ്മാനെ കാണണം. വാപ്പ പറഞ്ഞതൊക്കെ ശരിയാണോന്നു നിക്കൊന്നു ചോയിക്കണം ഉമ്മാനോട്.